Loading

Səlim Müslümov: Ünvanlı sosial yardım son qəpiyinədək vətəndaşlara çatmalıdır

16.11.2013 12:26
Vətəndaşlara ödənilən ünvanlı sosial yardım son qəpiyinədək onlara çatmalıdır. Həmin vəsaitin heç bir şəriki yoxdur və ola da bilməz. Bu yardım ehtiyacı olan vətəndaşlara dövlət tərəfindən ayrılmış vəsaitidir. Vətəndaşlar onu son qəpiyinədək alıb özləri istifadə etməlidirlər.

AzərTAc xəbər verir ki, bunu Qax şəhərində bölgə vətəndaşlarını qəbul edən əmək və əhalinin sosial müdafiəsi naziri Səlim Müslümov jurnalistlərə müsahibəsində demişdir.

Nazirin bildirmişdir ki, qəbul zamanı vətəndaşların müraciətlərinin böyük əksəriyyəti ünvanlı sosial yardımların təyin edilməsi və verilməsi ilə bağlı olmuşdur. Belə yardımların təyin olunmasında müəyyən problemlərin yarandığını vurğulayan Səlim Müslümov demişdir: "Bu gün bizə müraciət edən bir vətəndaşın ailəsində olan dörd nəfərin hamısı əmək qabiliyyətlidir. Amma onun dediyinə görə, həyat yoldaşı və uşağı xəstədir. Əlillik dərəcələri isə yoxdur. Onlar yenə də ünvanlı sosial yardım almaq istəyirlər. Vətəndaş deyir ki, gəlib həyat şəraitimə baxa bilərsiniz, mən kasıb vəziyyətdə yaşayıram. Digər tərəfdən baxanda isə, ailə üzvlərinin dördü də əmək qabiliyyətlidir. Ancaq heç biri işləmir. Onlara iş də təklif olunub. Ancaq işdən imtina ediblər. Belə olan halda necə hərəkət etməliyik?".

Nazir məlumat vermişdir ki, ünvanlı sosial yardımların təyin olunması və çatdırılması məsələlərinə yenidən baxılması nəzərdə tutulur. Bu sahədə ən başlıca vəzifə şəffaflığın, təmizliyin, qayda-qanuna riayət olunmasının təmin edilməsidir. Artıq bu proses başlanmışdır. Dünəndən etibarən bütün ölkə ərazisində noyabr ayının maliyyələşməsi açılmışdır və hesablara vəsait köçürülür. Nazirliyin mərkəzi aparatının mütəxəssisləri prosesi izləmək və buna nəzarət etmək üçün yerlərə ezam olunmuşlar.

Səlim Müslümovun sözlərinə görə, indiyədək ünvanlı sosial yardımların təyin edilməsində bərabər yanaşma prinsipi tətbiq olunmuşdur. Nazir demişdir: "Bu, əslində düzgün deyildir. Bu gün bizə bir vətəndaş müraciət etmişdir. Onun bir ayağı yoxdur, birinci qrup əlildir, əsaya söykənərək hərəkət edir. Ailədə beş nəfərdirlər. Üç uşağı var, üçü də məktəbli yaşındadır. Uşaqlar kiçik olduğu üçün həyat yoldaşı onlara baxır. Təbii ki, onların işləmək imkanı yoxdur və ailə başçısı birinci qrup əlilliyə görə cəmi 67 manat müavinət alır. Başqa gəlir yerləri də yoxdur. Ehtiyac meyarına görə, bu ailəyə 465 manat vəsait verilməlidir. Ancaq cəmi 89 manat yardım təyin olunmuşdur. Belə ola bilməz. Bu halda hər bir ailəyə fərdi yanaşma tətbiq olunmalıdır".
 
Hörmətli İstifadəçi, nəzərinizə çatdırmaq istəyirik ki, saytdakı bütün xəbərlər proqram təminatı tərəfindən avtomatik şəkildə digər resurslardan sistemə daxil edilir, buna görə, xəbərlərin saytda dərc olunmasında və ya mətnlərinin qiymətləndirilməsində heç bir insan faktoru iştirak etmir, əgər bu xəbəri hüquq/qanun pozuntusu, qeyri-etik və ya yanlış kimi qiymətləndirirsinizsə, xahiş edirik, bizi bu barədə məlumatlandırın