Elmira Axundova: "Mən gənclərdən soruşdum ki, bu adları bilən varmı?"

Milli Məclisin iclasında millət vəkili Elmira Axundova çıxış edib. Deputat bildirtib ki, bütün Azərbaycan fevralın 25-dən 26-na keçən gecə Xocalı şəhərində törədilmiş soyqırımın qurbanlarını yad edəcək: "Bir çox ölkələrdə mitinqlər, qətlə yetirilmiş soydaşlarımızla bağlı matəm tədbirləri keçiriləcək, yeni məqalə və dəyərli kitablar işıq üzü görəcəkdir. Xocalıda baş verənlərin soyqırım kimi tanınması istiqamətində göstərdiyimiz cəhdlərə beynəlxalq dəstək genişlənir, yeni-yeni dövlətlər, onların parlamentləri Xocalı faciəsinin soyqırım kimi tanınması barədə bəyanatlar qəbul edirlər.

Bütün bunlar fərəhləndirici faktlardır. Lakin mən bununla bağlı başqa bir məsələ haqqında danışmaq istəyirəm. Bu günlərdə gənc auditoriya qarşısında çıxış edərkən bir qrup azərbaycanlı döyüşçünün Xocalı şəhərinin müdafiəsində göstərdikləri qəhrəmanlıqları haqqında faktları qeyd etdim.

Belə ki, polis mayoru Əlif Hacıyevin rəhbərliyi altında OMON bölmələri həmin gün hava limanını cəsarətlə müdafiə edirdilər, sonda Əlif hava limanının nəzarət məntəqəsini partlatdı, özü isə döyüşdə həlak oldu. Ona ölümündən sonra Azərbaycanın Milli Qəhrəmanı adı verildi. Milli Qəhrəman adı verilən digər komandir Tofiq Hüseynov özünün bir dəstə döyüşçüləri ilə birgə yerli əhaliyə mühasirədən çıxmağa kömək edərək şəhər uğrunda mərdliklə döyüşürdü. Mühasirəyə düşdükdə isə o, son gülləni öz alnına vurdu.

Mən gənclərdən soruşdum ki, bu adları bilən varmı? Heç kəs cavab verə bilmədi. Bu çox acınacaqlı haldır. Qarabağ müharibəsi haqqında kitablar yazılır, gözəl məqalələr meydana çıxır, təəssüflər olsun ki, bizim gənclər onları oxumurlar. Həm də bu kitablar özləri də məhdud tirajla buraxılır. Heç də bütün məktəb və tələbə kitabxanalarına çatmır. Bununla belə, Qarabağ müharibəsində bizim onminlərlə döyüşçümüz şəhid oldu, çoxları qəhrəmanlıq möcüzəsi göstərdi və ölümlərindən sonra Milli Qəhrəman adı aldılar. Onlar arasında - həm türklər, həm ləzgilər, həm talışlar, həm ruslar, həm də ukraynalılar vardı. Bizim gənclər onların adlarını bilməli, onlarla qürur duymalı, onların bioqrafiyasını öyrənməli, həmin insanlara bənzəməyə çalışmalıdırlar. Bu böyüyən nəslin hərbi-vətənpərvərlik tərbiyəsinin bir hissəsi olmalıdır.

Buna görə mən bu tribunadan Təhsil Nazirliyinə, digər aidiyyəti qurumlara müraciət edərək çox xahiş edirəm ki, "XX əsr Qarabağ müharibəsi tarixi" adlı mövzunu orta məktəbin tədris planına daxil etsinlər. Bu dərslərə ildən-ilə yox, mütəmadi olaraq keçmiş döyüşçülər, Milli Qəhrəmanlar, şəhid olmuş hərbçilərin valideynləri dəvət olunsunlar ki, o vaxtki döyüşçülərin mərdliyi və qəhrəmanlıqları haqqında danışılsın. Qoy bizim uşaqlar anlasınlar: biz qəhrəman millətik, biz doğma torpaqlarımız uğrunda ləyaqətlə döyüşə və həlak ola bilirik. (bizimyolinfo)